السلام عليكم
اليوم راح احكي عن موضوع لازم حكيت عنه من زمان بس كسلي كان مانعني المهم واللي هو الابتوبات وكيف الحرارة فيهن وايش المقبول وايش مش المقبول وكيف ممكن تزيد الاداء او تقلل حرارته يعني بالمختصر راح يكون بوست طويل عن الحرارة والاداء في الابتوبات .
مقدمه عن الابتوبات introduction :
بشكل عام الابتوبات اصغر من الكمبيوترات وفيهم تبريد اضعف بستخدمو طاقه اقل واجمالات معظم الابتوبات اللي بنعرفها واللي بسوق بتنقسم لقسمين القسم "المكتبي" او ذو الاداء العادي او مش غيمنغ او مش خصوصي للتصميم والاوتوكاد والثري دي موديلينغ واللي اكثر شي منتشر بالسوق والمعظم بعرفه عن طريق انو اسم السي بي يو بكون بنتهي بحرف U مثلا زي i5-8520U
وهاد النوع بكون بسحب 15 واط للي حابب يعرف وبالعاده نسخ اي3 بتكون حرارتها ماكسيموم حوالي اخر ال60 اول ال70 وما بحمى كثيرع الضغط ولكن نسخه الاي 5 والاي7 بتحمى واحيانا خصوصا الجيل الثامن وبعده حتى الاي3 الحراره بتوصل باول ال90 بحيث انو الجهاز بكون ما فيه مراوح قوية لانو بكون رفيع وتبريدو مش كثير منيح لانو الهدف منه مش يضل مضغوط طول الوقت وحتى لو ضل مضغوط مش راح يعطيك نفس الاداء القوي بشكل مستمر اول ما تفتح مثلا فوتوشوب او اي برنامج بحيث انو لفترة صغيره بسوي boost للتردد بحيث انو بخلي الجهاز يسحب كهرباء عاليه حوالي 40واط او اكثر شوي حسب الشركه لاكمن ثانيه وهاد اللي مثلا بخلي الجهاز مرات بتفتح برنامج وبتبلش تشتغل اول اكم ثانيه بعدها بتحس الاداء خف شوي والنوع الثاني اللي بنعرفه اللي بكون غيمنغ او للمهندسين او للمصممين او اي حدا بحتاج الاداء القوي لفترة طويله مش زي انك تفتح برنامج زي الكروم لاكم ثانيه بكون ضغط ع المعالج بنحكي عن شغلات زي الالعاب وزي برامج التصميم والرندر والمونتاج وغيره .المعروفه انو معالجها بنتهي بحرف H or HQ or HK اللي بتعني اداء عالي وهاي المعالجات بتسحب 45واط وممكن اكثر حسب الشركه ولكن بشكل عام بتسحب 45 واط وهاي المعالجات 95% من الابتوبات اللي بتوجد فيهن بتكون اتخن من الابتوبات اللي ذكرتهم فوق ومجهزة للتبريد ولكن مع هيك بسبب ضيق المساحه لانو بضل لابتوب هاد الحكي مش كافي لتبريد هاي المعالجات بشكل كافي لذلك الشركات بتحاول تحل المشكله باحدى هاي الطرق بحيث بكون معلن عنه انو بشتغل بسرعه 3.9غيغاهيرتز ولكن بتلقاه بسرعه 2.8 وحتى 2.6 و2.4 غيغاهيرتز وحرارته بال70 وبهاي الحاله بكون بعاني انو الكهرباء اللي واصله للابتوب مش كافيه الا تشغله ع هيك تردد ، او بكون بشتغل بسرعه منيحه 3.9غيغاهيرتز او قريبه ولكن حرارة الجهاز بتكون باول ال90 واحيانا بتكون 95 او بتوصل 97 وشوي بعدها التردد بتشوفه نزل ل 3.2 غيغا هيرتز والحرارة نزلت وبعدها بحاول يرفع السرعه ل 3.9 غيغا هيرتز شوي وبعدها بتوصل الحرارة 97 مثلا وبضل هيك نازل طالع طالع نازل .
شويه شغلات لازم الكل يعرفها :
هس وقت الجد لابتوبات ب سي بي يو انتل بتتعامل مع الحرارة بطريقه انو عندو حد للحراره بالعاده 99 ولكن الشركات بتقدر تزيده وتنقصه مثل ابل حسب نسخه الابتوب والنظام اما 102 او 110 اما باقي لابتوبات الويندوز بكنن بالعاده 95 او 90 ومرات 85 والشركات بتسوي هيك بعلم انتل يعني مش معناها اذا حرارة زي هيك راح ينحرق او يخرب مباشره او او ولكن راح يقصر عمر المعالج بدل ما يضل مثلا 5 و6 سنين بخرب اسرع بقعد سنتين او 3 وهاد حاليا اللي قاعد بصير مع apple macbook pro بلابتوباتها 2016 واطلع وهاد من الاسباب اللي خلاهم يخملو الجهاز ويحسنو تبريده في اصدار 16.5 inch
لذلك خليني افسر اكم مصطلح مهم بحيث انو المصطلحات هدول بمثلو الطريقه اللي الشركات بتتحكم بالمعالج واداءه
thermal throtting :
بحيث انها بس تشوف الحرارة وصلت لحد معين فالمعالج بصير يبطىء حاله لحتى التوصل الحرارة لحد معقول ومقبول من الويندوز طبعا بغض النظر انها ما بتسال كم السرعه واطيه ولا عاليه لذلك مرات بتوصل ل 2.6 غيغا هيرتزوبتثبت عليها يوم يكون ضغط مستمر وهاي المشكله ممكن نوجدلها بعض الحلولبحيث ممكن تخفف حدتها بحيث انو عادي بوصل نفس الحرارة العاليه بعد ما تحاول تزبطه بس بالمقابل مثلا بتكون السرعه 3.4غيغا هيرتز بدل ما كانت 2.6 غيغاهيرتز او ممكن تضل 2.6غيغا هيرتز بس الحرارة تقل ولكن ما بعني انك راح تقدر تحلها بلابتوبك 100% ولكن نوعا ما بتقدر تحسن ولو شي بسيط
:power limit throttling
بحيث انها الشركه بتكون حاطيتلك بور سبلاي اقل من اللي بلزم الجهاز يعني مثلا الابتوب بلزمو 150 واط باقصى حاله حسب توصيات انتل بحطولك 140 واط او بكونو حاطين limit حد معين من جوا النظام عن طريق البيوس او الدرايفرز بحيث بضمنو انو السي بي يو مش راح يوصله طاقه كافيه بدل 45 بصير يوصله 35 واط مثلا وبالمقابل الكولينغ سيستم نظام التبريد راح يتحمل هيك حراره وما راح يوصل لحراره عاليه جدا ولكن المشكله هون بتكون انو السي بي يو ما بتوصل للسرعات المعلنه عنها والمفروض توصلها
بدل 3.5غيغا هيرتز بعطي 2.5غيغاهيرتز وحرارته بتكون احسن بس هيك ضحينا بالاداء ولكن في بعض البرامج اللي بتحل هاي القصة وبتسمحلك تسحب كهرباء اكثر من اللي حاطيته الشركه ولكن لا انصح لانو فعليا بتكون مسويه هيك لانو نظام التبريد ما بتحمل الحرارة اللي راح تكون ناتجه من المعالج
فلذلك ملخص انو اي لابتوب راح اداءه يكون محدود بوحده من احد هاي الحالات :
1- سرعته من انتل بحيث انو اذا وصلها وحرارتو طبيعيه بضل عند هاد الرقم يعني معلن سرعته 3.9غيغا هيرتز ما راح يتجاوزها
2- انو المعالج ما بتوصله كهربا كافيه تخليه يوصل التردد اللي حاطيته انتل
3- هي بسبب الحرارة بحيث انو الحرارة بتكون اعلى من اللي محددته انتل فالابتوب بتضطر يقلل سرعته عشان ما يطفي او يخرب المعالج
.
.
.
.
قبل ما ابلش اعطي نصائح وبعض الحلول حابب انوه لشغلة
اي شي بتسويه للابتوبك انتا مسوول عنه وما انا او اصحاب البرامج المستخدمه اي مسووليه عليه وما تيجي تقلي سويت زي اللي بالمنشور وعلق جهاز او الويندوز خرب او غيره وهاد فقط تحذير بحيث الشغلات اللي راح اقترحها امنه بنسبه 99.9% ولكن لا يزال هناك احتمال فلذلك لن اتحمل المسووليه وبتقدرو تدورو ايش مشاكل ممكن تصير معك راح اشرح بعض المشاكل اللي
ممكن تصير اثناء العمليه
اول طريقه ممكن تساعد فيها لابتوبك انك تبدل المعجونه بحيث انو معجونه الشركات مش دايما منيحه حتى الغيمنغ واللي شاريه جديد وحراره لابتوبه مثلا مباشره بس يفتح اي شي بتوصل 99 يعني يفتح فتوشوب او شغلات بسيطه والاداء سي شوف احكي مع الكفاله واتاكد منهم انو هيك طبيعيالا اذا شاريه من مكان غير موقع الشركه بحيث انو في مواقع بتوفرلك خيار انهم همي يبدلوه بنوع اخر بحيث انو تبديل المعجونه بخلي مستوى سطح التلامس مستوي اكثر والابتوبات بتتاثر بشكل كبير بهاد الحكي لانو التبريد مباشره ع المعالج نفسه ما IHS القطعه المعدنيه اللي لونها فضي اللي بكون مكتوب عليها اسم المعالج بحيث التبريد بكون مباشره ع die اللي هي قطعه السيليكون (المعالج الفعلي) ولكن احيانا مش راح تستفيد شي ولكنها احدى الطرق اللي ممكن تفيد خصوصا اذا الجهاز قديم اقدم من سنتين
الثانيه هي انو الابتوب يرتفع عن سطح المكتب 2 او 3 او 5 سم فقط بزوايه عن طريق ستاند بسيطه او تستخدم قواعد المراوح مع اني ما بنصح فيهن ما الهن ضرر سلبي ولكن ما بفيدو كثير اللي بفيد فعليا انك رفعت الجهاز عن المكتب بحيث انو الهواء راح يصير يمر احسن وممكن لحالها تفرق معك ل5 درجات وممكن درجه بس بكل الاحوال بتفيد وعادي بتقدر ترفع تحط دفتر او هيك شي تحته بمنطقه ما بتمنع مرور الهواء
الثالثه وهي الهدف من المشنور كله ولكن اعيد واكرر تنبيهي مش اني اخوفكم سويتها ع كثير اجهزة زي ما راح تشوفو بالفيديو حوالي 7ل8 اجهزة بايدي وما صار فيها مشاكل بالعكس كانت نتائج ايجابيه كلها بغض النظر انو كسبت كثير وفرقت كثير ولا لا
__________________________________________________________________________
UNDER VOLTING & UNDER CLOCKING
اول وهلة بس تشوفهن بتحسهن زي الاوفر كلوكOVER CLOCKING وبتخاف منهن ولكن لا داعي للخوف بحيث انهن عكس الاوفر كلوك بشكل كامل بحيث انو الاوفر كلوك بخلي المعالج يوصل لقوة اكبر من اللي حاطيتها انتل وبلزمها تبريد وغيره وغيره ولكن هون العكس تماما بحيث انو هون بخلي المعالج يسحب كهرباء فبصير ينتج حرارة اقل فبتزيد الاداء اذا كان اصلن بوصل اعلى حراره ولكن التردد مش اعلى شي ممكن تضل نفس الحرارة ويزيد التردد ولكن ممكن بوصل اعلى تردد وحراره مش اعلى شي بضل نفس الاداء بس حراره اقل وممكن لا بوصل اعلى حرارة ولا اعلى تردد وقتها التردد راح يزيد والحرارة عالاغلب تضل نفسها ممكن تقل حتى
خليني اشرحهن بالاول
under clocking :
نفرض انو معالجك بوصل لسرعه 3.9 غيغاهيرتزولكن حرارته بتوصل ل95 بعد دقيقتين او 3 او 5 او 10 لذلك بصير ابطىء فابطىء حتى يوصل السرعه اللي بتستقر عندها درجه الحرارة ممكن بتكون مثلا 2.8غيغاهيرتز او 3.2 غيغاهيرتز هس بسبب الطريقه اللي بتعامل فيها السيستم مع السرعه والحرارة الفكرة بتحكي انو السيستم بقدر يبرد لحد 35 واط ولكن السي بي يو بلزمها 45 واط بشان تلزم 3.9 غيغا هيرتز فلذلك السيستم ما بتحمل الحرارة الفائضه وبروح مسوي thermal throttling ولانو الحرارة عاليه صعب تبردها بنزل استهلاك الطاقه لاقل من 35 واط اللي بتحملها السيستم بشان الحرارة الزايده اللي كانت من ال45 واط قبل فبصفي النظام شغال ع السرعه اللي مش اللي بتكون ع 35واط بل اللي بتكون ع 25 واط يعني بدل ما يشتغل المعالج 3.2 غيغا هيرتزاللي بنقدر نصولها ع 35 واط بشتغل ع 2.8 غيغا هيرتز اللي بنقدر نوصلها ع 25 واط بحيث انو المعالج كل ما وصله كهرباء اعلى بقدر يوصل اداء اعلى
لذلك الاندر كولكينغ من الاول بنمنع النظام انو يتجاوز 3.4 غيغا هيرتز من البدايه وما خليناه يتجاوزها راح تضل السي بي يو على هاي السرعه بدل 2.8 غيغا هيرتز اللي كنا راح نجيبها وبهاي الطريقه اي استخدام لفترات طويلة واي شي بدو سرعه متواصلة بنكون حصلنا ع اداء احسن
والاندر كلوكينغ بنقدر نسويه بادوات من داخل الويندوز زي انو نفوت ع اعدادات الطاقه بعدها تغير اعدادات الخطه اللي بالازرق جمب اسم الخطه بعدها تغير اعدادات الخطه المتقدمه بعدها بتطلع نافذه بننزل لتحت لحد ما نلقى اداره طاقه المعالج(او شي شبيه) وبعدها بنختار اعلى حاله للمعالج(او كلمه قريبه) بتكون 100% بنغير ل 90% او 80% بحيث انو مثلا كان يوصل 5 غيغا هيرتز يوم ننزله ل 80% بصير يوصل ل4 غيغا هيرتز وهكذا ولكن هاي ما بتشتغل بكل الابتوبات زي لابتوبات اسوس ما بتزبط لانو برنامج armory crate بتجاهل اعدادات الطاقه الخاصه بالويندوز كلها ولكن في برنامج راح احكي عنه بفيديو راح احطه تحت بزبط ع كل الاجهزة .
under volting :
حابب اقرب الفكرة بهالمثال المصانع اللي بتعبي مثلا كياس السكر هل كل كياس السكر بتكون 1000غرام لا طبعا هاد اشي مستحيل ممكن تكون 1010غرام ممكن 1020غرام وهكذا ايش يعني هون يعني انو في عندي رينج للسكر اللي بكون بالبكيت والمعالج نفس الفكرة نوعا ما بحيث انو مش كل معالج بتوصل لنفس السرعه 4.0 غيغا هيرتز بنفس كميه الكهرباء المسحوبه
بحيث انو في لابتوبتي ولابتوبك عليهن نفس السي بي يو ونفس الجهاز ونفس الشركة ووو لكن المعالج تبعي بقدر يوصل لسرعه 4.0غيغا هيرتز ويستهلك بس 900ميلي فولت بينما جهازك بلزمه 1100 ميلي فولت عشان يوصل نفس السرعه فلذلك نرجع لمثال السكر صحيح انو فيه 1020 غرام و1050 غرام ولكن مش كل واحد فيهن بنباع لحاله كلهم بكونو 1كغم سكر والمعالجات نفس الشي انتل بتسويلهن ستاندرد تبيعهن فيه فلذلك صحيح انو معالجي بوصل 4.0غيغا هيرتز ع900ميلي فولت وتاعك ع 1100ميلي فولت ولكن الاثنين اصلن بكنن شغالات ع 1150ميلي فولت بحيث انتل تكون متاكده 100% انهن راح يشتغلن
فلذلك عمليه الاندر فولتينغ مفهومها انو فقط بتجيب المعالج وبخليه يشتغل ع اقل فولتيه بزبط عليها بحيث انو كل ما قللنا الفولتيه بتقل كميه الكهرباء اللي بستهلكها الجهاز ع التردد المعين وكل ما قلت الكهرباء المسحوبه بقل الحرارة الناتجه وبذلك اما الاداء بزيد او الحرارة بتقل وهيك بنكون خففنا من thermal throttling بحيث انو الحرارة بهاي الطريقه ممكن خلته ع الحفه بحيث انو نظام التبريد صار يقدر يتحمله ع هاي السرعه بينما قبل ما كان يقدر
اوخففنا من power limit throttling بحيث انو الكهربا اللي كانت تشغل الجهاز ع 3.0 صارت تقدر توصله 3.4
يعني بهاي الحاله انتا فقط خليت معالجك يشتغل باقصى طاقته
هس المخاطر اللي ممكن تسببها العمليتين الاولى underclocking ما في منها اي خوف وما بتاثر ولا على اي اشي ولكن بدون تسوي undervolting احتمال ما يكون في فرق او ما تحس فيه اصلن
undervloting هي من اقل العمليات مخاطر واسوء شي ممكن يصير انو تضطر تشيل بطاريه السيموسCMOS battery او البيوس بغض النظر عن اسمها وتفصل الابتوب عن الكهرباء وتحل بطاريته وترجه وتفصل البطاريه وبفتح ان شاء الله ولكن وانتا تسوي بالعمليه راح تكون عمليه تجريبيه يعني بتجرب تخلي الجهاز يشتغل ع 950 ميلي فولت زبط بتخليه ع 925 ميلي فولت وهكذا لحتى الويندوز يصير مش مستقر ويصير يعطيك شاشه زرقاء وقتها بتوقف وبترجع ع اخر قيمه كان زابط فيها ومستقر ومثلا بتعرف انو مستقر ع 950 ميلي فولت بتخليه 960 ميلي فولت بشان الامان والتاكيد طبعا المعالج بشتغل ع فولتيات مختلفه ولكن هون بنحكي عن اعلى تردد بوصله طبعا المعالجات مع الوقت بصير يلزمها فولتيه اكثر لذلك انتل برضو بتحط هداك الستاندرد اللي حكيت عنه بس فعليا حسب التجارب اللي سويتهم خلال سنه الجهاز لزم فقط 15 ميلي فولت زياده وانتا فعليا يوم تسوي اندر فولت بتجيب كل القيم ومره وحده بتعدلهن عن طريق offset بحيث انو انتا مثلا بتسوي اندر فولت بقيمه -110mv كانك جبت كل قيمه بشتغل عليها المعالج زي نفرض 900mv & 800mv & 700mv وخليته يشتغل ع 800mv & 700mv & 600mv
وطبعا ع العمليتين بتقدر توقفهم او تفصلهم امتى ما بدك بسهولة مجرد ما تسوي exit ع البرنامج من تحت ع اليمين بلتغي تاثيره وما ببطل اله اي اثر واصلن ما الو ملفات تثبيت بتشغل portable بشكل محمول مباشره .
وهي رابط لفيديو انا سويته طويل طبعا بعد هاد البوست خذلك استراحه شوي هههههه لانو الفيديو مدته 20 دقيقة شرحت فيه تفاصيل وذكرت فيه شغلات مهمة واتمنى ما تشوف الفيديو الا تا تخلص البوست صحيح انو طويل ولكن كل شي فيه مهم وما يجب اهماله وفيه كل الاساسيات اللي بتلزم عن معالجات الابتوب واداءهن اي حد عندو محلاظات شي استفسارات مشاكل يحط بالتعليقات سواء هون او ع اليوتيوب ونحللو اياها بالتعليقات بشان الكل يستفيد ويفضل ما حدا يوديلي خاص . وعليكم السلام
وتحملوني ما تقصفوني كثير ع جوده الصوت والتصوير :