السلام عليكم
اليوم راح نحكي عن موضوع الكيبوردات من الصفر حرفيا، لحتى تختار الكيبورد المناسب هاد البوست لوحده راح يعرفك بشكل عام على انواع الكيبوردات وايش بميز كل نوع وليش تختار نوع وتفضله عن الآخر.
نبدا بسم الله بالنوع الاول :
الكيبوردات الجلدية\العادية
( Membrane\Rubber dome keyboards ) :
اللي هو كيبورد ابو ١٠ ش اللي بنعرفه 😂 .
مبدا عمله يعتمد على فكرة انو تحت الكبسه فيه زي جلده وغشاء مطاطي(بلاستيكي مرن) بحيث يوم تكبس عليه بنزل لتحت وبسبب تلامس للطبقات اللي تحته باماكن معينه و هاد بسبّب ارسال اشاره، من خلال الاشارة بحدد الكمبيوتر اي كبسه انكبست.
وهي صورتين توضيحيات الاولى للكيبوردات العاديه والثانيه لكيبوردات الابتوبات والكيبوردات النحيفه جدا زي كيبوردات ابل كمثال( magic keyboard).
إيجابيات :
١- مالهمش صوت (بعرف فيه سويتشز ريد "لون احمر" بالميكانيكي بس لا يزال صوت الكيبورد بشكل كامل اعلى من الكيبوردات العاديه للاسف) لذلك يعتبرو مثاليين لبيئه العمل عشان . ٢- سعرهم منخفض حتى المناح منهم نسبيا بكونو ارخص من الميكانيكي . ٣- بتقدر تلاقي منهم كيبوردات نحيفه وخفيفه بحيث يسهل حملهم والتنقل فيهم . ٤- اذا متعود ع كيبوردات الابتوبات بامكانك تشتري منهن كيبورد نحيف ويعطيك تجربه كثير قريبه من كيبوردات الابتوبات، خصوصا يوم نطلع كيبوردات زي كيبوردات لينوفو الاسطورية.
سلبيات :
١- اذا الكبسات انهرين وراحو الاحرف وصارو بلمعو وكلهم زيوت شبه مستحيل تلقى بديل سواء للكبسات اللي عليها الاحرف او ما تحت الكبسات ( switches) . ٢- ما بتقدر تسويلهم personalization و customization يعني تخليهم ملونين واشكال وحركات او تعدل عليهم بعد ما تشتريهم. ٣- اذا اشي خرب صعب جدا تصلحه لانه القطع مش موحده او standardized يعني كل شركة شكل وتقنيه ونوع والخ. ٤- عمر الكبسات(طبعا بنحكي عن الجلدة التي تحت الكبسه البلاستيك under the keycap ) مش عالي جدا وانه يقعد مثلا 5 و 6 سنين، خلال فترة راح يخرب خصوصا اذا بتستخدم حرف لمده مستمره كثير واذا خربت كبسه الله يرحمه لانه ما فيه مجال تتبدل كبسة واحده فقط لحالها . ٥- بالعاده بالسوق عنا مش دايما بتلقى اللي نوعيتهن منيحه او جودتهن عاليه وفقط منلقى ابو 10ش او ما قريب عليه وحتى اللي بكنن غاليات شوي بكون فعليا المصاري اندفعت على الشصي والاضاءه والخ مش على جوده الجلد اللي ما تحت الكبسات.
الكيبوردات الميكانيكية
( Mechanical Keyboards ) :
من اسمهم ميكانيكيه معناها انه الكبسه بتشتغل بطريقه ميكانيكيه بحيث انو جوى كل switch قطعتين حديد بحيث عند الضغط عليها عند نقطه معينه بصير تلامس بين قطعتين معدن وهاي النقطه بنسميها actuation point تلامس قطعتين المعدن بأدي لارسال اشاره كهربائيه وعن طريق طريقه معينه بعرف متحكم الكيبورد اي كبسه انكبست .
فيه مصطلحات ثانيه مهمة تتعلق بوزن switch وغيره ولكن خليها للبوست اللي وراه.
انواع switches او الكبسات بحيث هون بنقصد ما تحت الكبسه اللي عليها الحرف ، بالعاده يتم ترتيبها باستخدام الالوان لكن اليوم حابب ارتبها بالطريقه الصح واللي هي كالتالي :
1- clicky :
او نقري : بحيث انو صوته زي صوت النقر على شي ما.
المعروف بصوته العالي والمسمى الشعبي هو الازرق Blue switches ولكن قد ياتي بالوان ثانيه زي الاخضر والاصفر من الشركات الثانيه مثل ريزر ولوجيتك وغيترون وكالي . بحيث عند نقطه التفعيل Actuation point زي ما حكينا فوق بكون فيه صوت قوي زي صوت طقه المفتاح او صوت قريب، وبكون بالعاده فيه قطعه حديد مخصوص عشان نتنج هاد الصوت.
2- linear :
او خطي: لانو ما فيه صوت زي كانك بتمرر ايدك على خيط.
وهو اللي بدون صوت ولكن بدنا نحط ببالنا انو بما انه السويتش بدون صوت لا يعني انو الكيبورد ما بطلع صوت لانه الكيكابس الكبسات يوم تكبس عليهم ويوصلو القاع راح يطلعو صوت للاسف، والمعروف شعبيا بالاحمر Red switches بحيث ممكن يجي بالوان ثانيه زي ابيض او شفاف او فضي او ازرق فاتح
3- tactile :
لمسي: لانه ما فيه صوت للطقه فقط بتحس فيها اذا كنت بتلمس وبتكبس على الكبسة.
وهو خليط بين الاول والثاني بحيث انك بتشعر بالطقه بشكل خفيف ولكن ما بيظرلها صوت زي الازرق وبكون صوتها زي الاحمر يعني للتقريب. يعني شعور الازرق بدون صوته يعني بصوت الاحمر ولكن فعليا الطقه بتكون يدوب محسوسه واخف بكثير من الازرق وفيه ناس كثير بتفضله كحل وسط بين الجهتين .
بالمحصله انا حبيت احكي عن الانواع بهاي الطريقه لانو فعليا مهما كانت الشركة واللون راح ينتمو لواحد من الانواع اللي فوق وملاحظه اخيره كل شركة ونوع يختلف الوزن/القوة الازمه للوصول لنقطه التفعيل يعني ممكن يكون عندك سويتشز اثنين من النوع الاول ولكن واحد يلزم 25غرام والثاني 35غرام من القوة عشان يتفعل وهو ياتي دور الشركات واختلافها ولذلك مثلا شركة زي
cherry mx : gray fast linear switches , red linear switches
عندهم سويتش رمادي واحمر، لانو الرمادي بده قوة اقل للتفعيل.
إيجابيات :
١- عمره طويل جدا
٢- يوجد كل الانواع والاشكال والاحجام اللي ممكن تحلم فيها
٣- اذا خربت كبسه بامكانك تفكها سواء كان فكها مع لحام او بدون وبتقدر تصلح switch وتنظفه بدون ما تبدله حتى ٩٠% من المرات واذا اضطريت تبدله بسهولة بامكاننا نجد اي نوع بلزمنا .
سلبيات :
١- سعره نسبيا غالي .(لكن اذا اخذنا بالحسبان كم ممكن يقعد معك مده راح تجد انو كلفه امتلاكه تقسم الفترة اللي امتلكتها ارخص من العادي لانو راح مثلا تضطر تخرب كذا كيبورد من العاديات قبل تخرب ميكانيكي ) .
٢- صعب بالعاده تعرف ايش بدك بالضبط اي نوع قبل ما تجربه بايدك بحيث قد ما تشوف فيديوهات وغيره تجربه باصبعك وتسمعه شي اخر .
٣- وجود طن هائل من الاختيارات فمرات كثيره المستخدم بقع بالحيرة وخصوصا اذا ما جرب اي نوع كيبورد قبل وللامانه هاي النقطه حلها صعب لكن كطريقه ما عشان تساعده يختار بالبدايه يروح على محل انترنت عنده كمبيوترات غيمنغ او يروح ع محل ستور بعرض البضاعه يجربها كذا كيبورد وكذا شغله راح تساعده نوعا ما وتعطيه لمحة عن اي الشغلات المهمة بالنسبة اله، كمثال انا بعض الكيبوردات بتضايق من الاضاءه الثابته فيهم ويوم احرك راسي زي بتشكل خيالات بالوان قوس قزح مختلفه.