السلام عليكم
في البدايه ، كلنا مرينا بمرحله ما استخدمنا فيها برامج مدفوعه "ببلاش" ، أي بالمصطلح التقني (هكرناها\كركناها\تفعيل) وأنا أولكم ، وكلنا أكلنا فايروسات وضاع علينا ملفات مهمة سواء كانت شغل، أو ذكريات، وغيرها الكثير وما قدرنا نرجعهم للأسف ، وكلنا قعدنا ساعات واحنا ندور على "تفعيل" لبرنامج معين وننزل من هاد الرابط ونجرب وما يزبط ونضيع كثيييير وقت ، وحتى لو لقينا "التفعيل" اللي بدنا اياه ، هل عمرنا فكرنا بمصدره ؟ الدافع وراه ؟ ايش فيه جواته ؟ كل هاي الأسئلة ما عندنا جواب الها وهاد الحكي بشكل خطر على معلوماتنا وخصوصياتنا واحنا مش عارفين ولا منتبهين للأسف، كل هاد دفعني بمرحله ما من حياتي إني أدور على بدائل مجانيه للبرامج ، ومع أنو وقتها في سبيل التسلية والتحدي كان هدفي أني ألقى شي مجاني بيأدي اللي بدي إياه ، ولكن بعد ما وعيت اكتشفت انها من أفضل الشغلات اللي سويتها بحياتي وانها فرقت كثير ، ومن المفاجىء انه كثير مرات كنت أنصدم بجودتها وكيف مع انها مجانيه كيف كانت تتخطى جوده البرامج المدفوعه ، ولذلك اليوم جايب خلاصه تجربتي وايش بستخدم كبدائل على أمل حد يستفيد منها.مدفوعه .
بسم الله نبلش:
الكل بيعرف ويندوز وهو نظام التشغيل والمعظم بيستخدم ويندوز ١٠ هالأيام
اهم شي نظام التشغيل ويندوز 10 ، مش راح اجي واقترح واقلكم استخدمو نظام linux لا راح اقلكم استخدمو ويندوز 10 ولكن بدي أحكيلكم أكم معلومة تصدمكم، أولها ويندوز 10 سواءاً كان مفعل أو لا الاداء ما بيختلف ، التحديثات برضو لا ما بتختلف ، التعريفات برضو ما بتختلف ، كل اشي مهم ممكن تفكروا فيه ما بيختلف سواء فعلتوه أو لا ، طيب راح تحكولي ليش فيه تفعيل أصلاً؟ فيه بعض الخصائص والمميزات للشركات الكبيرة بتكون بلزمها تفعيل وأغلبها شغلات تختص بالإدارة والمراقبة وغيره، وفيه بعض الشغلات البسيطة مثل تغير لون الويندوز من الازرق للون اخر. بالنسبة للإشارة المائية راح احطلكم طريقه بسيطه طبقوها وراح تختفي الاشارة وتبطل مزعجتكم.
اخر حوالي 6 سنوات كمية الاجهزة اللي خليتها بدون تفعيل كبيرة جدا وما في حد تقريبا من اللي تركت جهازه بدون تفعيل أصلا انتبه لأنه الإشارة المائية مش موجودة ومخفيها وكل شيء بالنظام لازمه موجود، طيب ممكن تسالوا ايش بتستفيد مايكروسفت ؟ راح احكيلكم انو مايكروسفت بطل مصدر ربحها الرئيسي من بيع ويندوز ١٠ بحد ذاته بل ممتده الى أبعد من هيك والشركات حاليا تهدف انها تدخلكم لعالمها عشان تربح منكم، يعني انتا بتروح بتنزل ويندوز وبرضو بتستخدم اوفيس اللي من مايكروسفت وبرضو onedrive للتخزين من مايكروسوفت وهكذا فمن مصلحتهم اصلا انكم تدخلوا على عالمهم ويكون الدخول بارخص واسهل شي ممكن .
وهي رابط فيه شرح إزالة الإشارة المائية.
https://firasr.blogspot.com/2021/08/remove-activate-windows-10-watermark-10.html
للمعلومه مش انو حكينا فوق عن الويندوز كل البدائل فقط راح تكون للويندوز ، معظم البرامج والبدائل الها نسخ على linux , windows , macos .
Microsoft office suite: google-office(online) , online office(online) , libre office , wps office
ننتقل لثاني اهم شي Microsoft office وللأمانة يعتبر هو أفضل برنامج ولكن 99% من الناس بتستخدمش هاي البرامج بكل خصائصها الكامله وبكفيها شغلات أبسط بكثير واللي أصلا راح تخليهم يشتغلو أسهل وأحسن وأسرع لأنها ابسط وأخف، اول بديل هو من مايكروسوفت نفسهم office online بحيث بإمكان المستخدم يفوت على office.com وينشىء حساب مجاني ثم يتوجه ل onedrive اللي بيعطيه 5 غيغا مجاناً بيرفع عليه الملف اللي راح يشتغل عليه، وبإمكانه يوصله ويشتغل عليه من إي مكان بالعالم ويعدل عليه عن طريق موقعهم عن الطريق البرامج اللي الناس متعوده عليها مثل Microsoft office word\excel\power point .
بديل اخر اون لاين واللي انا بستخدمه كثير ومنتشر بالدول الغريبه كثيييييير ومعظم المدارس بتستخدمه لسهولته وفاعليته وبلزمش حتى تعلم الشخص حتى يعرف يستخدمه وبنصح الكل يعطيه على الأقل تجربه واحده، وبامكانكم تفوتو عليه من حساباتكم الجيميل عن طريق الضغط على ال9 نقاط بجانب الايقونه واختيار docs\slides\sheets او عن طريق الضغط على احد الروابط :
docs.google.com \ sheets.google.com \ slides.google.com
وبديلين للناس اللي بتحتاج تعدل أوفلاين الأول من البرامج اللي فيها 99% من إمكانيات الاوفيس وبتشبهه جداً جداً ،
https://www.libreoffice.org/download/download/
وأول 30 ثانيه من هاد الفيديو راح يسمحلك تغير شكله عشان يصير زي شكل أوفيس الحديث، لأنه بالشكل الإفتراضي أقرب لشكل الأوفيس القديم ، https://www.youtube.com/watch?v=bg-3ndzy_tc .
وبرنامج اخر بيشبه الاوفيس جداً جداً WPS office وبيجي افتراضياً نفس شكل الأوفيس فقط اضغط الرابط ونزل النسخه المجانية (النسخه المدفوعة بتعطيك فقط تخزين سحابي عشان إذا بدك تشتغل أونلاين).
Internet download manager (IDM) : FDM
https://www.freedownloadmanager.org/
ننتقل لبرنامج ادارة التنزيلات واللي بيعرفه المعظم وبيستخدمه خصوصا اللي بينزلو ألعاب ومسلسلات وافلام، وللأمانة إنه إذا مش منزل أحد هاي البرامج أو شبيهاتها ففايتك كثير،ونيجي للبديل اسمه free download manager (FDM) وللأمانه أنه أبهرني أكثر من IDM المدفوع من الميزات الاضافيه اللي فيه منها أنه بنفس الوقت بتقدر تستخدمه لتنزيل ملفات torrent ولسى شكله احلى 😂 وهي رابط تنزيله .
WinRar : 7-zip
https://www.7-zip.org/download.html
بديل winrar للملفات المضغوطه مع انه الكل بتطلعله تاعت الدفع بيحط اكس وبيمشي ولكن النسخ اللي بنستخدمها فعليا غير قانونيا وبيقدرو يرفعو فيها قضايا ، بالنسبه النا كافراد ما بتفرق لكن كشركات مصيبه واقترح برنامج 7-zip .
ISO- burning : rufus , balenaEtcher
https://rufus.ie/en/ https://www.balena.io/etcher/
بديل برامج حرق ملفات iso وانظمه التشغيل مثل revo , imgburn , ultraiso واقترح rufus الرهيب اللي فيه كل شي ،
ولكن للي بيحب لسى برنامج ابسط فيه balenaEtcher .
Recording - streaming : obs studio
https://obsproject.com/download
برنامج اخر يستخدم للي بيسجلو دروس اونلاين ومحاضرات وغيره الغني عن التعريف obs studio ممكن فيه البداية يغلب شوي وفيه شوية صعوبه بالاستخدام لكن بعد شوية بحث بسيط باليوتيوب ومشاهده فيديوهات راح يساعدك ويطلعلك أحسن نتيجة ممكن تحصل عليها ويعتبر الافضل بكل شي .
ننتقل لبدائل برامج Adobe المشهورة ، للأمانة وعشان نكون دقيقين 100% لما تكون كل البرامج من شركة وحدة راح تكون متناسقة اكثر بكثير مع بعض ولكن معظمنا بكون بستخدم برنامج او اثنين منهم وحسب تجربتي كان البدائل اللي راح اذكرها اكثر من كافية .
Adobe photoshop : gimp , canva
https://www.canva.com/ https://www.gimp.org/downloads/
بشكل عام بستخدم أكثر من برنامج عشان أحصل على النتيجة اللي بحتاجها لأنو مش دايما الشخص بكون حابب يسوي تصميم من الصفر ، بشكل اساسي gimp هو البديل اللي راح نسوي فيه كل التأثيرات والشغلات المتقدمة والفلترات المتقدمة والطبقات والخ ، ولكن معظم الأحيان بنكون حابين نسوي تصميم سريع جميل ونستخدمه بمكان معين ووقتها بتوجه canva اللي فيه كثيييييييير شغلات حلوة وسهل وبسيط التعامل معاه وأونلاين وبتقدر تتشارك بالرابط مع حد وتعدلوا على نفس الشي مع بعض و 99% canva بعتمد عليه .
Adobe XD : Figma
https://www.figma.com/downloads/
مع أنه adobe xd من برامج adobe القليلة المجانية ولكن مشكلته عدم توافره على كل أنظمة التشغيل بحيث أنه مش موجود على linux ، وبرنامج figma تقريبا فيه كل شي موجود عند adobe xd .
Adobe Premiere : Davinci Resolve
https://www.blackmagicdesign.com/products/davinciresolve/#
مع أنه Adobe Premiere جزء كبير من الناس تعتبره التوب لكن مع هيك Davinci Resolve النسخه المجانيه، من إنشاء شركة black magic من العمالقة في مجال الكاميرات حتى أنه برنامجهم المجاني يعتبر الأفضل في مجال color grading اكثر حتى من Adobe Premiere المدفوع اعطوه فرصه حتى انتو جماعه مدمنين Adobe Premiere .
وتنسوش أي شيء بتحتاجوه فقط بحث بسيط باليوتيوب وراح تعرف تسووه ب٥د .
Adobe Illustrator : ink scape
https://inkscape.org/release/inkscape-1.1/
بيسمحلك بالتلاعب بملفات svg و vectors اللي مثلا بنجيبها من مواقع زي freepik , flat icon .
Programming IDE's : Visual studio code + extentions
وهي موقع من احد الأصدقاء بيعطيك بدائل مجانية واقتراحات زياده . 😊
https://alternativeto.net/
—- —- ——-
Gaming : epic games , summer sales , black friday sales 26/11/2021 , cyber monday , xbox pass ultimate
وكأخر موضوع خليني أحكي شوي عن الألعاب معظمنا (الغيمرز) بنستخدم ألعاب مكركة خصوصاً ألعاب الستوريز\سنغل بلاير لأنو تقريبا فش إشي مجاني للأسف، ولكن مع إنهن "ألعاب" ضد أنه الواحد يكركهن لأنه احنا هيك بنساهم انو المطورين والشركات ما تعرف ايش احنا بنحب، لذلك رأيي الشخصي نستنى العروض السنوية زي الجمعه السوداء بالمناسبة راح تكون 26\11 للسنه الحالية بكون فيها عروض خرافيه ووراها برضو cyber monday، بحيث بإمكاننا بمبالغ بسيطه اقل من 50ش نشتري اللعبه اللي بدنا اياها وخصوصاً إذا بنكون مهتمين بلعبه معينه، منه بنشجع الشركات والمطورين ومنه بصير عنا إستهلاك اكثر عقلانيه للألعاب واختيارنا إلها لأنها بتبطل الشغله بس اكبس ونزل، وبرضو بنفس الوقت بإمكان الكل ينزل epic launcher ويحصل على لعبه مجانا شبه أسبوعياً صحيح مش كلهن ألعاب خرافية لكن مع الزمن بتجمع كمية ألعاب محترمه إلا يكون منهن لعبة تعجبك، غير هيك بقترح على الكل اللي عنده صحاب عندهم حسابات xbox pass ultimate ياخدوا حسابات صحابهم ويجربو يروحو ع microsoft store ويشوفوا كمية الألعاب الخرافية زي forza4 وغيرها وما راح يأثر على صاحبه ولا يطلع من الحساب وإذا الألعاب عجبوك بإمكانك مثلا تتفق مع صاحبك تدفعله 50ش بالسنه وتستمعلك بالفوق 100 لعبة اللي بتعرضها مايكروسوفت.